ازاى تختار القسم المناسب ليك في كلية زراعة؟!

 _احنا_بنختار_القسم_على_أساس_ايه؟؟  

- بنختار القسم على أساس 4 حاجات أساسيين بغض النظر عن ال GPA 

1- هل الشغل التابع للقسم دا مناسب لشخصيتي وميولي ولا لاء ؟ 

2- هل الشغل التابع للقسم دا مستقبله قوي ولا ضعيف ؟ 

3- هل الشغل التابع للقسم دا هيكون ف مناطق تناسبني ولا لاء؟ 

4- هل الشغل التابع للقسم دا هيساعدني اعمل بيزنس خاص بيا ولا هيحكم عليا أفضل شغال موظف عند الناس طول عمري؟  

تعالوا نتكلم عن كل نقطة منهم بالتفصيل .. 

1- كتير من الطلاب بلاقيهم بيسألوا " ايه هو أعلى قسم ف الكلية" عشان يدخلوه ،  

# الناس دي حاجة من اتنين يا ما عندهمش هدف و بيسعوا ورا المظاهر، يا مكسورين من بعد الثانوي و عايزين يردوا اعتبارهم و يدخلوا أعلى حاجة ف الكلية. 👌

هم هنا فكروا بطريقة سطحية جدا.. 

هم عايزين يدخلوا أعلى قسم وخلاص بس ما سالوش نفسهم هل القسم يناسبني فعلا ولا لاء ؟ هل هنجح فيه وهقدر أحقق ذاتي ولا لاء ؟ هل هقدر اتحمل الشغل بتاعه وطبيعة العمل؟ 😉

- قسم زي قسم البان مثلا من أعلى الأقسام في الكلية بس هل انا هقدر اشتغل ف معمل ريحته لبن و اكمل حياتي فيه وانا اصلا عندي حالة نفسية من شكل وريحة اللبن؟ ( في ناس كتييير كدة، بيتعبوا من ريحة اللبن )  

 الشغل ف شركات اللابان بيكون 6 أيام ف الاسبوع 3 ايام شغل صباحي و 3 شغل مسائي.. هل انتِ ك بنت هيتناسب معاكي انك تشتغلي بالليل او تسهري ؟ و هل لو الشركة دي مكانها بعيد هتقدري تباتي برا وتقضي باقي حياتك بالنظام دا وصحيان من الفجر كل يوم عشان تلحقي؟؟  

فين حياتك اللي عيشتيها ؟ 

قسم أغذية بردو من أعلى الأقسام بس هل هتقدر تتحمل الضغوط بتاعته؟ 

طب هل انت اصلا بتحب الالتزام والانضباط و الشغل من الساعة 7 للساعة 5 و التأخير دقيقة ب غرامة و الجو دا ولا انت بتحب الحرية اكتر و ماحدش يتحكم فيك؟ بتحب الربح بتاعك يكون مبلغ ثابت ومتحدد ولا بتحب يكون حسب شطارتك و قابل للزيادة والنقصان !  

هنا بتفرق 👌

طيب قسم زي زهور وزينة مثلا وشغل اللاندسكيب. من اكتر الشغل اللي ممكن تكسب منه فلوس بس هل عندك المهارات ف شخصيتك اللي تخليك تعرف تبدع ف شغلك وتنجح اكتر و تجيب فلوس كتير ولا معندكش المهارات و هتبقى مجرد مهندس لاندسكيب عادي ف شركة طول عمره بمرتب متحدد ؟  

دي اول نقطة. 

 لازم الشغل يكون متناسب مع شخصيتك ومهاراتك و قدراتك و تتأكد انك هتكون سعيد فيه طول عمرك مش هتزهق منه بعد كدة. 👌

تاني نقطة : 

هل الشغل دا مستقبله قوي ف مصر ولا لاء وهل مستقبله قوي ف السفر ولا لاء؟ 

هنا بتسأل نفسك سؤال.. انا عاوز اشتغل ف مصر واعمل كيان ل نفسي و اسم واكبره مع الوقت ولا انا عاوز اسافر و اشتغل برا مصر؟  

ناخد مثال.. البايوتكنولوجي ، القسم دا شغله محدود شوية ف مصر.. معظم شغله ف معاهد البحوث أو معامل التحاليل وكدة

 ودا فرص الحصول فيه على وظيفة ف مصر بتكون قليلة شوية و بتقدير عالي طبعا. بس فرصته ف السفر و الشغل برا عالية جدا. وطبعا بشروط و تقدير عالي.  

باقي المجالات اعتقد كلها متوفرة ف مصر. ✋

اللاندسكيب هو اكتر مجال مطلوب خارج مصر

و شغل اللاندسكيب مش بس من قسم زهور وزينة.  

ممكن كمان هندسة زراعية ( يشتغلوا ف انشاء شبكات ري) أو قسم أمراض نبات ( يشتغلوا ف برامج الوقاية)  

تالت نقطة : 

هل طبيعة الشغل دا بتكون ف مناطق تناسبني ولا لاء ؟ 

يعني مثلا 

- قسم كيميا معظم الشركات بتكون خارج المدينة  

- قسم إنتاج حيواني او دواجن. المزارع هتكون على الصحراوي و معظمها محتاج مبيت ( يعني تبات ف الشغل) هل انتِ ك بنت هتقدري تعملي دا ؟ 

هتقدري تعيشي وسط ريحة الامونيا دي طول عمرك؟  

- شغل اللاندسكيب معظمه ف الساحل الشمالي.. بس انت ك ولد هتقدر تبعد عن اهلك و تعيش ف شقة مغتربين ولا مش هتقدر! 

  أنتِ ك بنت هتقدري تروحي الساحل وترجعي كل يوم ولا مش هتقدري؟ 

 لو هتقدري مبروك عليكي الشغل لو مش هتقدري يبقى هيكون شغلك ف المكتب الفني للشركة ودا بمرتب أقل بس بيكون غالبا ف المدينة عادي و هيكون كل شغلك على اللاب توب . 

 هكذا الولد لو مش قد البيات برا هل هيكون عندك صبر تقعد ف المكتب و تشتغل ع اللاب طول اليوم ولا لاء؟ 

رابع نقطة و الأخيرة : 

اسال نفسي هل الشغل دا بالنسبالي هيأهلني بعد فترة اني افتح شغل خاص بيا ولا هفضل طول عمري موظف بمرتب ثابت؟  

كلامي هنا هيكون موجه للبنات اكتر لأن بيصعبوا عليا.  

بيصعب عليا اشوف الشغف اللي عندهم دا والإصرار انهم يشتغلوا و يحققوا ذاتهم بس ف الاخر بيشتغلوا ب مرتبات ضعيفة..  

طب ليه؟  

علشان كدة ما بنصحش ابدا البنات انهم ينزلوا يشتغلوا شغل عادي بمرتب ثابت و يقارنوا نفسهم بالولاد.  

 المفروض يغيروا الروتين دا بقى و يبدأوا يفكروا ف ازاي يعملوا شغل خاص بيهم.   

البنات لو عملوا مشروعات خاصة هينجحوا اكتر من الأولاد 

البنات عندهم صبر و إصرار اعتقد اكتر بكتير من الأولاد. ✋

فليه يفكروا ف شغل محتاج مجهود بدني أو شغل ف مزرعة والبهدلة دي،  

ما تعملوا مشروعات صغيرة مع بعض و تسوقولها بنفسكم

زي انتاج الماشروم مثلا و هتنجحوا جدا وهتكونوا معززين مكرمين ف بيوتكم مش محتاجين تبقوا برا و ولا تباتوا ف ريحة الامونيا. و الفراخ 🐁🐓

دا رأيي الشخصي و لكم حرية الاتفاق أو الاعتراض✋

 بس نصيحتي ليكوا فكروا كويس اوي وراعوا أن حياتكم ممكن تتغير ف لحظة زي خطوبة أو جواز مثلا يعطلكم عن الشغل ف الأماكن البعيدة و كدة تبقوا خسرتوا كل مشواركم التعليمي.. الحل مشروع خاص..

كتير مننا بييسمع أن شغل مش بيرتبط بتخصص معين وأنه خريج زراعه بيشتغل ف اي مجال ؟ 

كلام ده صحيح طبعا بس انت حاليا ف فتره دراسه و كليه يعني المفروض ف إيدك أنك تختار اللي يناسبك ..

و نصيحة أخيرة ما تستخسروش مجموعكم العالي و تقولوا ادخل بيه قسم عالي بدل ما اضيع فرق الدرجات والكلام دا

صدقني انت لو عملت كدة ودخلت قسم مش مناسب ليك هتبقى ضيعت كل حياتك مش بس ضيعت الدرجات ✋ 

ربنا يوفقكم ف اختياركم🤍